जागतिक आदिवासी दिनानिमित्त ‘बिरसा आर्मी’तर्फे भव्य रक्तदान शिबीर; ३९ रक्तदात्यांचे योगदान
तळोदा (प्रतिनिधी):
जागतिक आदिवासी दिनाचे औचित्य साधून बिरसा आर्मी संघटनेच्या वतीने येथील आदिवासी सांस्कृतिक भवनात भव्य रक्तदान शिबिराचे आयोजन करण्यात आले होते. या सामाजिक उपक्रमास उत्स्फूर्त प्रतिसाद मिळाला असून, परिसरातील तब्बल ३९ रक्तदात्यांनी रक्तदान करून सामाजिक बांधिलकी जपली.
शिबिराचे उद्घाटन अतिरिक्त जिल्हा शल्यचिकित्सक डॉ. नरेश पाडवी यांच्या हस्ते पार पडले. या प्रसंगी मार्गदर्शन करताना डॉ. पाडवी म्हणाले, “आपल्या जिल्ह्यात सिकलसेल रुग्ण आणि गरोदर मातांना रक्ताची सातत्याने मोठी गरज भासते. त्यामुळे बिरसा आर्मीने राबवलेला हा उपक्रम अत्यंत स्तुत्य आहे. तरुण पिढीने शिक्षणावर भर देऊन, आरोग्याची काळजी घेत व्यसनाधीनतेपासून दूर राहिले पाहिजे.”
यावेळी डॉ. महेंद्र चव्हाण यांनीही आपले मनोगत व्यक्त केले. “रक्तदान हेच श्रेष्ठदान आहे. निसर्गनियमानुसार रक्त हे कृत्रिमरीत्या तयार करता येत नाही; केवळ मानवच रक्तदान करून दुसऱ्याला जीवनदान देऊ शकतो,” असे मत त्यांनी मांडले.
रक्तदात्यांचा गौरव
शिबिरात रक्तदान करणाऱ्या सर्व ३९ दात्यांना बिरसा आर्मीच्या वतीने टी-शर्ट आणि सन्मानपत्र देऊन गौरविण्यात आले. या शिबिरासाठी नंदुरबार सिव्हिल हॉस्पिटलच्या डॉ. हर्षा मोरे, डॉ. गीता गाभुड, किरण मोरे, ईश्वर वसावे व त्यांच्या वैद्यकीय टीमने मोलाचे सहकार्य केले.
प्रमुख उपस्थितांची नोंद
कार्यक्रमाचे स्वागत आणि प्रास्ताविक संस्थापक अध्यक्ष राजेंद्र पाडवी यांनी केले, तर यशवंत वळवी यांनी सूत्रसंचालन करून उपस्थितांचे आभार मानले.
या प्रसंगी बिरसा आर्मीचे जिल्हाध्यक्ष भरत पावरा, सचिव सतीश पाडवी, धडगाव तालुकाध्यक्ष अजय वळवी, नवापूर तालुकाध्यक्ष राकेश वळवी, अक्कलकुवा तालुकाध्यक्ष मानसिंग पाडवी, तळोदा तालुकाध्यक्ष देविसिंग वळवी, कार्याध्यक्ष हिरालाल पावरा, कालूसिंग पावरा, सुभाष पाडवी, दिनेश वसावे, तापसिंग पाडवी, कुवरसिंग पराडके, मुकेश कापुरे, योगेश पाडवी, हंसराज महाले, मंगल पाडवी, गुलाबसिंग पाडवी, संजय पाडवी आणि प्रकाश नाईक यांच्यासह संघटनेचे कार्यकर्ते व नागरिक मोठ्या संख्येने उपस्थित होते.
